Est cumentzau unu progetu nou de Radio X. Ge’ ddu scieis chi s’arradiu nosta est un’arradiu chi xircat sempri de ponni impari assotzius, artistas, genti de geniu po contai ita est buddendi in sa pingiada casteddaia: custa borta boleus contai storias, storias de timi. Dd’eus tzerriau Spaventose Frequenze. Ita est? Duus registas de duas cumpangias de teatru (Elio Turno Arthemalle de Teatro Impossibile e Valentina Fadda de Batisfera), si funti pigaus a scientis dexi circadoris de istorias sutzedias in Casteddu. Funti storias de i-cussas chi si còntant a boxi bascia, a su noti, storias de duenas e aremigus: cussas chi cummentzant sémpiri a sa propriu manera: “labai chi cussu chi si contu imoi est sutzediu diaderus…”
Donnyunu de nosus ndi connoscit a su mancu una pariga: domus maladitas, genti chi bis oi e cras ti nanta chi as biu calincunu chi est giai mortu de dexi annus, cosas sparessias e aparessias in atrus logus, boxis a de noti, mazinas, bisus te tempus benidoris…
Donnya storia at a tenni unu logu suu (depit essi unu logu connotu de is casteddaius), unu contadori o una contadora (chi funti cussus chi ant biu cun is ogus insoru su spantu), e una scantu attoris chi arrecitant is partis prus fortis.
Su traballu at a sighiri fintzas a su mesi de gennargiu: immoi funt arregollendi storias, intervistas, connoscendi genti. Apustis at a tocai a iscriri, a ponni musigas, sonus, boxis. Cun s’annu nou cummentzaus a ddas donai in s’arradiu. Si si boleis agiudai cun calincunu contu (depit essi cosa sutzedia diaderus), si podeis circai in s’arradiu e totu, e si torraus gratzias de imoi. No’ scieus ancora ita eus a contai: cun siguresa, nd’eus a scarraxai cosas de casteddu chi nisciunus scidi o chi nisciunus at tentu ancora su coru de contai pubricamenti. Prontus seis? Nosus seus giai a pilurtza pesada….
