Tempus de oi si fait in d’una arradiu chi nàrat Radio X – Cagliari Social Radio. Poita si ddu seus arregordendi? Poita su traballu chi seus circhendi de fai no’ est sceti cussu de ponni musica, donai novas e si fai unu pagu de cumpangia, ma puru cussu de arrexonai cun bosatrus: de s’oberri sa porta e si lassai intrai, de intendi ita ndi pensais bosatrus de is cosas chi sutzedint in tzittadi e a giru de Casteddu. Po nai: in custas cidas seus intendendi genti meda fueddendi (e abettiendi puru) de macchinas e parcheggius. Is de Castedd’e Susu domàndant atrus parcheggius asulus, Comunu e comitaus funti punta po punta po is traballus a santa Gruxi, aundi bolint fai is parcheggius tuppaus, in atrus logus depint ponni is presas po carrigai is macchinas a currenti, Ezio Castagna de su CTM hat bintu unu premiu po mellus manager pubricu….
Ita bolint nai totus custas cosas postas impari? Is casteddaius arrennescinti a lassai sa macchina firma oi prus de cantu anti sèmpiri costumau a fai? Ita idea si seis fatus? E bosatrus, po girai in Casteddu, comenti s’arregulais? Pigais su pullman? Andais a pei? In bicicretta? O sigheis a si pigai feli girendi a quattr’arrodas? Est sa boxi de bosatrus chi boleus intendi! Circaisì o scrieisì: tempusdeoi@radiox.it www.radiox.it www.facebook.com/radiox96.8
