“Da Dove Sto Chiamando” Festival internatzionali de arti performativa

De su 26 de ladàmini a su 29 de dònniasanti unu biaxi a intru de is artis performativas contemporàneas nci ant at essi de su Lazzaretto de Sant’Elia a s’Auditòrium Comunali de pratza Dettori passendi po su Palatzu de Tzitadi de Casteddu de susu. Custu tretu est unu esèmpiu bonu de duus assòtzius chi si ponint a pari po apariciai unu festival chi est a tretu de metadi de is artis chi portant a innantis. Mùsica, dantza, vìdiu, performing arts custu est “Da Dove Sto Chiamando” sa segunda editzioni nàscia de s’atòbiu de duus festival chi funt “Autunno Danza” e “Signal Festival”, presentau martis su 21 de ladàmini 2014 de Momi Falchi e Tore Muroni de s’assòtziu Spazio Danza e de su diretori artìsticu de TiConZero Alessandro Olla.
Meda is òspitis internatzionalis cumenti su composidori e sonadori de percussionis americanu Z’Ev, su dantzadori de butoh giaponesu Gyohei Zaitsu, sa cumpangia de dantza frantzesa Beau Geste e cussa catalana Vero Cendoya ma fintzas is dantzadoris italianus Simona Bertozzi, Daniele Albanese, Francesca Foscarini, Michela Lucenti, Sara Marasso. E galu is musicheris sperimentalis Gianluca Becuzzi, La Generale d’Experimentation, Raoul Moretti, Adam Ansen, Olivier di Placido, Sec e meda atrus. No ddoi funt sceti artis performativas ma fintzas laboratòrius e workshop cumenti “Paesaggi sonori” fatu de su Centro Arti Integrate de Matera. Po s’ocasioni sa lìnia 7 de su Ctm at a tzirculai in Casteddu de susu e in is logus de su festival dei noi oras fintzas a mesunoti e a pustis puru.