FESTIVALSCIENZA

Si podeus, donaus unu cuntzillu: fintzas a su noi de donnyassantu baxei a s’Exma o a su Parcu de Monti Craru a biri calincunu de is attobius de su Festivalscienza. De ita seus fueddendi? Festivalscienza, occannu est’arribbau a s’annu de seti, e bolit ponni impari studiosus, agiudadoris e mundu de s’informazioni po fai is contus apitzus de su traballu scientificu in Sardegna. S’idea manna est de ponni in pei in domu nosta unu xentru de importantzia europea.
Po una xida s’ant a podi intendi e connosci prus de 50 spertus cumbidaus,chi ant a apariciai 78 atobius in 22 logus diferentis. Numurus de importu, e de importu ant a essi is maneras de contai sa scientzia: arrexonadas, spettaculus, animazionis, liggiduras…
Su cumitau Scienza Società Scienza, postu in pei de Carla Romagnino, in is annus passaus at tentu, po donnya xida, prus o mancu, 12 mila personis chi funt andaus a biri e intendi: occannu, fortzis, ant a essi de prusu: difatis traballant aintru 47 intra de dipartimentus de s’universidadi, scolas, associazionis, museus de scienzia, e giai 400 volontarius.
Su cumitau at detzidiu chi custa borta su titulu est La Scienza ci aiuta, po fai biri comenti de sa xirca scientifica ndi potzant giuai totus, in sa vida de donnya di’.
Po una xida, duncas, eus a podi cumprendi comenti sa sotziedadi potzat umperai sa fisica, sa matematica, sa scientzia naturali, sa chimica, s’astronomia in cosas comenti su sport, s’ambienti, sa saludi chi funti de importu mannu po donnyunu.