Ba’, a su chi parit, s’istadi est bell’e spacciàda. Unu de is sinnus chi prus ndi sàrtiant a is ogus est chi si tòrrant a biri pippius a tallus in is arrugas, a s’intràda e a sa bessìa de scola. E duncas, est torràda a cambiai sa facci de sa tzittadi nosta, un’atra borta, po s’arregordai chi sa Terra camìnat totu a giru de su soli, e chi avatu de s’istadi arrìbat s’atongiu. E imoi is pipius puru, chi funti pipius de s’edadi nosta, hant a torrai a bivi comenti chi fessinti traballadoris giapponesus, sempri a nerbius allutus: de sa scola a su cursu de danza, de dom’e jaja a s’allenamentu de basket. Curri-curri, che su babu e sa mama. A ddus lassai giogai in sa ruga no si fidat prus nisciunus: ca cùrrint is machinas, ca est prenu de genti perigulosa, ca logu de giogai no’ ci nd’est. Eppuru, hiat a tocai su propriu a scioberai una di’ de sa xida po lassai is pipius a solus, a giogai e a andai a spérdulu in su bixinau. Logus de giogai no’ ci ndi fianta mancu prima, in cittadi, e ci fiant perigulus che a oi e totu. E is pipius bessìant, e giogànt in donnya contonàda, e connoscìant donnya furrungoni acant’e domu. Fortzis, s’unica manera de connosci diaderus is logus est a ddus girai sentz’e tenni nisciunu interessu: oi, is logus chi connosceus funti cussus chi si sérbint: s’arruga po arribai a su traballu, su logu de ci ponni sa machina, sa market prus baratu… Comenti faeus a si ddus fai praxi? Ita tènint de si nai? Nudda. Ma una di’, una di’ a sa xida, intzandus, scapiaus is pipius e lassaus chi a su mancu issus si bìvant is logus sentz’e nisciunu interessu, cun amori e cun spassiu, a gratis.
