Po una borta, ndi pigaus su logu de Tempus De Oi po iscriri de una cosa chi si tòcat de acanta. Eia, poita de is milli cosas chi circaus de si contai donnya di’, una prus de is atras est’intràda in sa vida de is de Radio X e, arrengratziendi a sa bona sorti, po fintzas in is vidas de milli e milli casteddaius. Seus fueddendi de Buongiorno Cagliari, su programma chi, cummentzendi de su 17 de argiolas de su 2006 fait cumpangia a is casteddaius (e no’ sceti), po duas oras de su lunis a su xenabara.
Ndi fueddaus poita ca costumaus a fai duas festas mannas a s’annu: una est suLive (e faeus su programma anant’e sa genti), e s’atra est su Pride, sa festa de is ascurtadoris.
Cust’annu, su Pride ddu faeus anch’e’ su Presidio de Viale Trento, anant’e su palazziu de sa regioni, imbiaus e accullius de sa genti chi est ingunis aposentàda giai de milli diis, cramendi is derettus suus.
Su trinta de i-custu mesi, duncas, s’heus a biri cun totus is ascurtadoras e is ascurtadoris chi funti sa prenda manna de su traballu nostu. Nosu de s’arradiu boleus chi scìpant ca torraus gratzias a totus, unu po unu, po s’ascurtai e po s’essi sighìu in totus custus annus. Est traballosu meda chi una trasmissioni sìgat po tant’annus. Nosus faeus cussu chi podeus: ma si arrennesceus a andai a innantis ancora est sceti po s’amori e sa passientzia de chini s’ascùrtat.
Deus si ddu pàghit.
