Tòcat a scioberai!

Candu is cosas de fai funti medas, tòcat a scioberai, ca no fait a essi in prus de unu logu a sa borta. Est stetia una xida de attopus, de spettaculus e de grandu traballu po cuncordadoris, artistas e genti comenti a nosus e totu, chi pròvat a si contai cussu chi sutzèdit a giru. E duncas, de is milli cosas chi eus biu e contau, si ndi sinnaus sceti una pariga, tiradas de su muntoni mannu. Po nosus, custa est stetia sa xida de Leggendo Metropolitano – I giochi dell’essere, cuncordàda de s’associazioni Prohairesis in Castedd’e Susu; sa xida de is cantoris de Studium Canticum, chi po Spettacolo Aperto ci funti bessius a cantai in s’arruga, a plaia de mari, appitzus de s’erba de is Giardinus Pubricus e fintzas in is pullman de su CTM e, serrendi, sa xida chi hat incingiau is MercoledìX, cun is mellus DJ de s’arradiu nosta a s’Old Square de Casteddu. Ma est stetia puru sa xida de su Rally in via Arroma, de is casteddaius appoddaus a sa televisioni po sighiri sa Dinamo, de is Mondialis de Beach Volley a su Poettu….