TORRANT MUSICAPOI E MUSIC IN TOUCH

Musicapoi est unu cuncursu internatzionali de compositzioni contemporanea e unu cantieri dedicau a sa sperimentazioni de su sonu.
Is operas chi ant passau sa seletzioni, ant a essi sonadas de s’Ensemble Spaziomusica domìnigu su 21 de su mesi de capudanni a nca s’Exma’ de Casteddu, cuntzertu chi sighit a una residèntzia artìstiga de tres diis in Sàrdara. Is artistas chi ant a fai parti de s’editzioni de ocannu ndi bennint de totu su mundu e funt Ruud Roelofsen, M.G. Villalobos, Paolo Pecin, Dan Di Maggio, Marco Marinoni, Francesco Maggio, Oren Boneh, Maurizio Marzo e Francesco Medda.
Musicapoi est apariciada de s’assòtziu Spaziomusica Ricerca in collaboratzioni cun Spaziomusica Cagliari chi at a donai a sa bidda de Sàrdara duus spetàculus: giòbia su 18 de capudanni ant a presentai “Voci…Oltre il buio” de Pieranna Spezziga e cenàbara su 19 de capudanni nc’at a essi “La Grande Madre” de s’Assòtziu Figli d’Arte Medas.